uaduq

jabar, kateuajegan sunda, jeung indikator pulitik indonésia

In capruk on April 24, 2014 at 3:25 pm

doangna loba nu kungsi ngadéngé omongan ieu: mun deuk ningali partai mana nu meunang pemilu di indonésia, tingali wé nu meunang di jawa barat.

coba wé urang tata ti pamilihan taun 1999. di jabar nu meunang pdip, nasional gé nu meunang pdip. taun 2004, di jabar golkar, nasional golkar. taun 2009, di jabar démokrat, nasional démokrat. jeung mun deuk percaya kana hasil quick count taun 2014 gé bakal nambah kuat omongan di luhur, pdip nu cek sakabéh qc lembaga survéy unggul di nasional, di jabar ogé unggul.

naon sababna? naha jabar bisa kitu? pangira mah, hal ieu disababkeun ku sababara hal. hiji, pamilih di jabar téh panglobana. dina pamilu 2014 dpt di jabar aya 33 juta pamilih, 18% ti total nasional. jatim nu jumlah pamilih dpt di posisi kadua géséh 3 juta leuwih saeutik.

anu kadua, migrasi. cek bps laju tumuwuh penduduk di jabar téh nu pangluhurna di indonésia. leuwih jangkung manan angka nasional. taun 2013 laju tumuwuh penduduk di jabar 1,6%, sedengkeun sacara nasional ngan 1,5%. tina 1,6% éta, leuwih ti 60% disumbang ku migrasi.

ti taun 70-an, gancangtumuwuhna ékonomi jabar lir ibarat madu amis nu ngondang tiwuan. jabar jadi pangjugjugan balaréa ti sakuliah nusantara. aya nu nyebut, gara-gara luhurna migrasi di jabar, proporsi sélér asli jabar kiwari kari satengahna (padahal cek survéy mah masih sakitar 70%an :D). hasil sénsus 2010 mertélakeun sakabéh séké sélér sakuliah indonésia boga wakil di jabar. sedengkeun migran umumna pan tetep boga tali kuat jeung wewengkon asalna.

cek statistika, sahenteuna aya dua hal nu nyababkeun hiji statistik bisa présisi naksir paraméter populasi. nu kahiji, kakawakilanna karageman populasi, jeung nu kadua badagna jumlah sampel. dua hal éta geus nyampak jeung dicukupan di jawa barat. ditambah deui nyaéta kaunikan sélér sunda, nu jadi sélér pribumi di jabar. sanajan, cénah ngan kari 50% tina jumlah populasi di jabar, tapi pan masih jadi sélér mayoritas. sunda keukeuh boga peran gedé, nu nangtukeun arah pulitik.

mun ditingali tina hasil pemilu, sunda boga “idéologi” teu ajeg. teu doang jawa béh tengah nu keukeuh pdip, atawa jawa di tungtung wétan nu “rada” keukeuh pkb. sunda mah dina tilu pemilu téh ogé boga tilu partéy anu béda.

kateuajegan sunda, karasa deui dina pilgub. najan pdip, golkar, démokrat nu kilir meunang pilég, mangsana kudu milih gubernur mah sunda kalah milih ti pks.

kateuajegan sunda nerus tepi kiwari. dina pilég 2014. sanajan di bandung nyirekem gubernur pks nu suni puritan, kang jalal caleg pdip nu siah bisa lolos. terus warta panganyarna nyebutkeun, calon dpd nu muja kaparawanan kang acéng ogé bakal lolos ka senayan.

ku kituna, ragem indonésia beuki kawakilan ku jawa barat & sunda. jawa barat boga pamilih pangbadagna jeung sélér lengkep ti sakuliah nusantara. ditambah kateuajegan mawa sunda jadi sélér nu di jerona boga karageman luhur. cocog jadi sampel sajati. sabab sunda boga: éksékutor suni puritan, législator siah, jeung sénator nu muja parawan. bhinéka tunggal ika nyampak di jero dirina. jadi ulah héran mun ibu tien masih hirup boga kahayang mindahkeun tmii, ti cipayung ka ciroyom, nya!😀

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: