uaduq

gedé wadul!

In capruk on August 6, 2008 at 6:56 am

,,bafak ceudeum teung. kumaha di batutulis?”
,,sami, mau hujan besar jigana.”
,,cilaka kaya kieu mah. isukan jakarta pibanjireun yeuh. kantor kakeueum deui.”
,,ah keun wé bongan jarorok. buang sampah kamana karep.”
,,enya nya. bari cenah di puncak gé mah leuweung geus korédas. disulap jadi vila.”
,,kang di mamana manusa ngaruksak jagat mah. pan cenah dunya keur harééng ayeuna téh. suhuna terus nérékél.”
,,akang gé kungsi ngadéngé. malah salasaurang tokoh kahot ti amerika mah nyieun pilm pisan. di dinya diténjokeun kumaha pikariwangeunna dunya kahareup. enya pikahariwangeun pisan”
,,padahal nu mikiran mah teu saeutik nya?”
,,heueuh. ngan euweuh gunana ari ukur ting corowok di konpérénsi-konpérénsi, jeung seminar-seminar eungkul mah. angger ukur ngulikbek di jero ballroom hotél béntangan. moal kungsi nepi ka leuweung sumatra, kalimantan, sulawesi, jeung papua mah. komo ka kutub meureun.”
,,tuuuuuuuuutttttt”, jadol siah. béak. cupu cipi kana saku calana tukang hareup. euleuh, récéh geus korédas. gagang hideung telepon umum ditumpakeun ka cagak pérak deui. digejrétkeun. ngalieuk ka tukang, pok ngomong ka kang yaya, tukang roti bakar nu mangkal sajajar jeung telepon umum, “kang ya, boga récéh?”
“euweuh”
“nya seug atuh ari kitu mah, dahar heula ah kang. yu mangga!”
“nya sok atuh”
kumbung biru merk gagang telepon dibuleudan jeung kang yaya jeung gorobagna ditinggalkeun. suku ngincid muru warung sangu pentaseun. luak-lieuk, jorelat lumpat meuntas jalan. sup asup ka warung. nyeungir ka si emang purah ngalayanan. ngarérétan deungeun sangu nu geus diatur tingkat-tingkat dina etalase kaca sangkan katingali kunu ngaliwat..

,,wah aya euy!” cekéng, rada ngajorowok.
,,naon téa?” cek mang ocid, tukang warung nu tadi diséréngéhan.
,,kancing dewa”
,,oh éta, pan keur usum”
,,cik mang pangmungkuskeun sangu lah”
,,siap, jeung naon?”
,,tangtos jeung si kancing, sapuluh bébék mah. éta wéh tongkol dua keureut.”
,,nggeus? cukup?”
,,cukup! kétang tambahan sambel mang. sing rada loba”
,,cai mungkus?”
,,enya atuh. biasa wé entéh. lekoh nya mang. kadé poho kudu panas”
,,sip…. yeuh!”
kérésék eusi bungkusan sangu jeung ci entéh ditampanan. créng mayar. geus kitu mah incid. ngingkig deui. muru warung citra usaha. warung kolontong lumayan euyeub, dua ratus meter ti warung sangu mang ocid. nu bogana urang jawa, ngan geus lila ngumbara di bogor.

,,mba roko sebungkus. sama éta tah. akua”, cekéng ka nu boga warung
,,akua yang mana?”
,,ituh yang gelas aja. dua”
,,apa lagi?”
,,sudah”, leungeun katuhu mikeun duit keur mayar. kérésék wadah roko jeung akua dijingjing ku leungeun kénca bareng jeung kérésék wadah sangu jeung cai entéh.

incid deui. ayeuna mah misi kabéh geus laksana. waktuna mulang.

datang ka kontrakan. panto pager dibuka. jetrék muka konci gembok, bus ka garasi. kalacat nécé hambalan. di lanté luhur, kamar kabéh nutup. malolor kénéh sugan. kurah koréh kana handapeun tumpukan baju meunang nyetrika si bibi tukang babantu sapopoé. néang konci kamar. tah geuning. terus muru panto kamar. bus konci dina kana liangnakeun. diputer, jetrék kabuka. pereket pantona didorongkeun. bus. perekét. sorosod selot. panto ditulakan ti jero. dua kérésék di tunda luhureun méja komputer. euleuh siah aya nu poho. sorosod tulak diudar deui. gebray panto kabuka. lol sirah dikaluarkeun. masih can katingali sasaha. rohangan tengah masih simpé, teu kadenge sora najan sadésibel. réhé. panto kamar séjén angger nutup. geblay muru rak piring, di sisi katuhu panto kamar. kop leungeun katuhu kana tumpukan piring. kapilih nu plastik pulas kayas. si piring terus dikempit dina kélék. leungeun kénca kop kana séndok. leungeun katuhu ngagapay ka hambalan kadua rak piring. kop kana mug keramik cap chélsea. geblay deui muru panto kamar. bus asup. rekét, panto ditutupkeun. diselot deui ti jero. piring, mug, jeung séndok ditunda gigireun kérésék.

cetrék ngahurungkeun lampu. bray. jandéla kamar dibukakeun. gek diuk luhureun bantal. leungeun ngaragaman. knop power komputer diteueulkeun. guruh sora kipas prosésor awor jeung kipas vga jeung kipas-kipas séjénna. monitor ngilu dihurungkeun. kitu deui jeung spéker. gap kana beubeuritan. kursor diarahkeun ka ikon buled wmp. jandélana kabuka. di libraryna ditéangan kecap koil. kapanggih. klik dibuka. gembréng tembang ‘kenyataan dalam dunya pantasi’ kareungeu. sora si otong dipirig ku sora brangbréngbrong hitar, dram sabaladna. wmp diminimais. kursor diséréd ka handap ka lebah ikon fm 08. klik. bray muka. nungguan rada lila. katingali tulisan ‘load last game’. klik. loading deui. nungguan deui.

halah… awak malik 90 darajat ka katuhu. gap kana rimot mini hi-fi. knop power-na diteueul. terus knop radio. tunning… euweuh nu rame. eureun di 103,7 fm. agnés keur ngajomantara. volume sora radio dileutikan. kop kana rimot tipi. knop dua. transtv. gosip. malik deui ka kénca. dina layar monitor pangluhurna katingali ‘uaduq manager, fiorentina’ dilalangsean bungur. der nga-fm…. samenit….. kop kana bungkusan nu tadi diteundeun gigireun monitor. cai téh dikaluarkeun. kop kana mug. ditunda luhureun karpét. congo plastik bungkus cai ntéh digégél. cer caina dipancerkeun kana jero mug. pinuh teuing. lébér. cai maseuhan karpét. geuwat ngarongkong bungkusan tisu nu sayaga luhureun cpu. sedot sedot ditarik aya kana genep lambarna. rada dikeupeul-keupeul. terus diteueulkeun luhureun karpét baseuh. leungeun ngarongkong deui bungkusan. bungkus sangu. karét pameungkeut dibuka, kertas sangu dibébérkeun. ditunda luhureun piring. dungkukan sangu diguarkeun. bébékan kancing déwa diriungkeun sisieun sangu bareng jeung tongkol jeung sambel. caleuhak. am sangu panyocol sambel sahuap, ségét satengah bébék kancing, diburu ku ciwit tongkol. leungeun kédé angger ngoprék beubeuritan. leungeun katuhu keukeuh terus ngopépang ka sangu ka sambel ka kancing ka tongkol. panon manco ka monitor. haté kukulutus. jadol, éléh deui-éléh deui. séndok mah kapopohokeun. teu karasa. ngalimed. sangu, kancing, tongkol teu nyésa. nu nyésa ukur saucrit sambel jeung beureum-lunyuna bungbu. kari seuhah. kutap kétap kénéh. ramo katuhu dilamotan.

leungeun kénca dileupaskeun tina beubeuritan, ngarongkong deui tisu. dua lambar didudut. las las ngusapan bibir camérong. ngadudut deui dua lambar. dipaké meresihan ramo nu lisnir kalamotan. tisu, keretas sangu dibebeskeun kana kérésék. lung dialungkeun ka luar ngaliwatan jandéla. ceg kana bungkus roko. puhuna disoéhkeun. kop sabatang. seut diseungeut. pelenyun. kop kana mug. regot. nepi ka korédas. geus hareuyheuy…

halah bayeungyang. baku ari geus dahar téh. kaos nu dipaké didudut liwat sirah. dada buligir baseuh ku késang. jadol kamarana sakadang angin téh nya? euweuh ngahéos. kodongkang kana kipas luhureun awak hi-fi. knop angka dua diteueul. gelebug. lumayan. kop kana akua. leguk nepi ka béak. lung plastik wadahna dialungkeun. sarua deui-deui liwat jandéla. co deui manco ka monitor. poé éta lawan siena. cénah, di artémio franchi. menejerna ti kamari geus sosoak. si ungu moal henteu bakal disasaak ku timna. ceklék ‘continue’ didedetkeun kursor. milih pamaén. teu lila da geus baku. pamaén inti, starting élépen tara ieuh digunta-ganti. ceklék deui ‘continue’ ‘yés’ ‘play’… but bet dua puluh hiji titik tingserebet… pada sapuluh silih rangseg marebutkeun hiji deui. dua deui ngajentul diunggal tungtung. tara kaluar ti kalang pakeunna. …. jadol éléh. bosen. tunduh deuih. kursor ngarah ka ‘options’, barabay, kursor muru panghandapna. jeklék ‘quit gém’. ‘yés’ ‘yés’ ‘yés’….. panon ceuleuyeu. puntung belewer dialungkeun. liwat deui jandela. muru kasur. golédag. nangkarak bengkang… acara tipi dihareupeun geus ganti jadi ‘jelang soré’. si agnes masih norowéco di 103.7. si otong ngagorowokkeun ‘ajaran moral sesaat’ nu katilu kalina. panon beuki ceuleuyeu…

—ke doya. tungtung taun.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: